martedì 2 luglio 2013

Intervista a s'Assòtziu Su Majolu

In sa foto: LIsandru Beccu e Luiseddu Caria
Pro connoscher mègius su mundu indipendentista in s'Universidade e in s'iscola sarda amus fatu carchi pregunta a s'Assòtziu Su Majolu. Nos at torradu imposta Lisandru Beccu, un'istudiante de s'Universidade de Tàtari de 27 annos.

Cando est nàschidu s'Assòtziu Su Majolu e cale est s'iscopu suo?
S'Assòtziu Su Majolu est nàschidu in Tàtari in su mese de Martzu de su 2011 e in su giru de custos duos annos amus fatu paritzas initziativas. Su chi cherimus est mescamente de nche fàghere intrare sa limba sarda in totu sos livellos de istrutzione, dae sas iscolas de s'infàntzia a sas universidades de s'ìsula e posca batende·la nessi a su matessi gradu de impreu de s'italianu, comintzende dae sas istitutziones pùblicas, fintzas a lòmpere a unu bilinguismu perfetu.

Bos amus bistu ativos meda pro cussu chi pertocat s'amparu de sa cultura e de sa limba sarda. Ais presentadu fintzas carchi motzione pro insignamentu in sas iscolas. Comente ant rispostu sos istudentes e s'Universidade a sas initziativas bostras?
Amus presentadu a su Retore de s'Universidade de Tàtari duas o tres motziones e petitziones. In su 2012 amus collidu 1000 firmas de istudentes universitàrios, pedende·los si fiant de acordu a istituire duos cursos de làurea pro formare professores e maistros de limba sarda. S'Universidade non fiat de acordu, ma abarrat su fatu chi 1000 istudiantes nos ant agiudadu in custa initziativa.
In su mese de Nadale de su 2012 amus iscritu a su guvernu italianu e a su parlamentu europeu pro sa chistione de sa ratìfica de sa “Carta Europea de sas Limbas Regionales e de Minoria”.
S'ùrtima petitzione l'amus fata bator meses a como, in Abrile, pro pònnere unu esame de sardu in ogni cursu de làurea de cada dipartimentu in s'Universidade de Tàtari. In custa ocasione ant firmadu sa petitzione prus de 700 istudiantes iscritos a s'ùrtimu annu de sas iscolas superiores de totu sa Sardigna. In prus, su Retore fiat interessadu a custa initziativa e nos at naradu chi s'at a impignare de pessone pro nche pònnere unu esame de sardu nessi in sos dipartimentos umanìsticos.

Ais otènnidu resurtados cuncretos o creides de los otènnere prus a in antis sighende a traballare cun impinnu?
Sos resurtados sunt pagos, ma a bellu a bellu sighende a traballare cun cabu ant a arribare fintzas sas satisfatziones mannas. Pro como s'Ateneu nos ant asseguradu chi at a comintzare su cursu FILS (Formazione Insegnanti di Lingua Sarda) finantziadu dae sa Regione. No at a èssere meda, ma est giai carchi cosa si andamus a bìere comente fiat sa situatzione in antis.

Cale aina ais impreadu fintzas a como pro ispàrghere sas ideas bostras?
Sa cosa prus cumplicada fortzis est cussa de cumprendere in cale manera si podent fàghere acurtziare sos giòvanos a su movimentu linguìsticu. Un'aina ùtile podet èssere sa rete sotziale comente Facebook, in ue semus presentes, in prus amus fintzas produidu unu giornale chi si mutit “Ischida” in ue publicamus totu sos artìculos chi sos istudiantes nos mandant.
Depimus ammustrare chi sa limba sarda e s'impreu suo faghent e ant a fàghere parte de sa modernidade, petzi gasi amus a resessire a fàghere acurtziare sos giòvanos.

In s'Universidade de Tàtari giughides raportos cun àteros grupos universitàrios o calicunu interessadu a sas batallas chi faghides?
Fintzas a como nos semus mòvidos semper a sa sola, ma si b'at carchi grupu o assòtziu de istudentes chi nos cheret agiudare a mandare a in antis sa pelea de su bilinguismu, a nois nos faghet petzi praghere.

S'Assòtziu Su Majolu s'at a candidare mai a sas eletziones universitàrias?
Beh, si podet èssere una manera pro fortzare galu de prus s'isvilupu de una polìtica bilìngue in intro de s'Universidade non nos amus a pònnere in segus, antis, amus a fàghere de totu pro bìnchere. Pro como s'obietivu est cussu de crèschere un'àteru pagu sighende a traballare comente amus fatu fintzas a como.

Su 19 de Làmpadas seis istados in Casteddu a un'initziativa organizada dae Scida2013: est istadu su comintzu de una collaboratzione chi at a bìere semper de prus aunidu su movimentu de sos istudentes sardos?
Fiat in s'adòbiu “In Tretu pro s'Universidadi Sarda: no sceti bilinguismu” in ue amus tentu sa possibilidade de nos cunfrontare pro su chi pertocat s'Universidade in Sardigna.
Su caminu est longu, ma b'at giai ligàmines medas cun sos istudiantes de Scida. In Casteddu sunt faghende unu traballu prus che bonu e sunt retzende cunsensos medas, est su caminu giustu.
De seguru amus a tènnere àteras ocasiones pro nos adobiare e pro traballare paris a medas progetos chi amus a cumone.

S'esperièntzia de Scida segundu a bois podet abèrrere s'àidu pro sa nàschida de unu ùnicu movimentu mannu de istudentes?
Sa nàschida de unu movimentu mannu de istudiantes sardos est prus possìbile de cantu si potzat crèere. Cando est nàschidu Su Majolu amus pensadu deretu chi b'aiat bisòngiu de unu movimentu de totu sos istudiantes sardos e non petzi de cussos de Tàtari. Sa nàschida de s'assòtziu nostru e sa nàschida de Scida faghent a cumprendere chi in Sardigna sa cussèntzia de sos giòvanos est mudende e chi b'est su bisòngiu de fàghere propostas diferentes dae cussas de sos movimentos de istudiantes chi sunt ligados a sos sòlitos partidos italianistas. Su tempus benidore nos at a dare resone e at a nàschere s'assòtziu de totu sos istudentes sardos.

Ite raportos tenides cun sos partidos e sos movimentos indipendentistas? B'at collaboratziones e pensades chi su traballu bostru potzat afortire sas batallas indipendentistas comente cussa pro s'amparu de s'ambiente e sa valorizatzione de sa limba sarda?
Sos raportos chi amus àpidu fintzas a como sunt istados de collaboratzione in una paja de adòbios e initziativas. Pro su chi podimus semus a dispositzione mescamente pro cussu chi pertocat s'amparu de sa limba, ca s'obietivu primàriu chi nos semus postos est cussu. Prus a in antis ant a pòdere nàschere fintzas àteros tipos de collaboratziones, ma pro como est mègius a caminare a bellu a bellu.

Unu pàrrere bostru subra sas eletziones regionales chi ant a bènnere: si faeddat semper de prus de minorias linguìsticas e de natzione chene istadu comente sa Catalogna. Pensades chi potzat mudare carchi cosa cun su rinnovu de su consìgiu regionale in Sardigna o at a abarrare totu comente est como pro cussu chi pertocat su patrimòniu culturale e linguìsticu?
Comente pàrrere ti potzo nàrrere su meu, ca cada unu a livellu polìticu giughet sas ideas suas.
Naramus chi pro sos partidos e sos movimentos minores su caminu est giai in pigada pro unu muntone de chistiones chi no isto inoghe a repitere. Si in prus sos partidos autonomistas e italianistas chi ant guvernadu fintzas a como càmbiant sas regulas de su giogu a favore issoro (comente est sutzessu dae pagu cun s'aumentu de percentuale de isbarramentu), tando sa batalla si faghet galu prus difìtzile.
Est beru, a livellu europeu si chistionat semper de prus de Europa de sos Pòpulos e de minorias linguìsticas, ma non s'est fatu mai cantu bastat. Sa Catalogna e s'Iscotzia sunt esèmpios chi pro mene non depent èssere leados tropu in cunsideru, su traballu chi depimus fàghere lu depimus fàghere inoghe chene abbaidare a àteru logu.
In Sardigna depet galu crèschere sa cussèntzia e s'amore pro s'istòria e sa cultura chi nos apartenet, si nono no at a mudare nudda, sa mentalidade nostra si depet abèrrere e depimus pessare chi tenimus sa possibilidade de isvilupare su 100% de su potentziale, a diferèntzia de su 10% chi nde semus boghende a pìgiu in custas cunditziones de dipendèntzia e farsa inferioridade.
Duncas, sa risposta mea est chi si ant a sighire a guvernare sos matessi partidos chi lu sunt faghende dae 60 annos a como amus a abarrare semper s'ùrtima regione perifèrica de Europa.

Comente si diant dèpere cumportare segundu a bois sos movimentos indipendentistas pro àere cunsensos polìticos e a manera chi si potzant fàghere passos a in antis pro sa defensa de su patrimòniu istòricu e culturale de su pòpulu sardu?
Pro comente la penso deo b'est su bisòngiu chi si traballet a manu tenta pro sos temas chi interessant totu sa comunidade e su patrimòniu istòricu, ambientale, culturale e linguìsticu creo chi siant prenda de sa majoria de sos sardos.
Però penso fintzas chi tra sas organizatziones indipendentistas manchet una cosa de importu mannu, sa comunicatzione tra sos movimentos.

Seis semper in prima lìnia pro cussu chi pertocat s'amparu de s'ambiente e de su territòriu. Tempus coladu bos ammentamus impignados in sa luta contra a su nucleare e dae pagu in una campagna prus minore contra a sos fogos. Pensades chi sos istudiantes universitàrios tèngiant una cussèntzia ambientalista e cales ainas si podent impreare pro trasmitere in intro de s'universidade su rispetu pro s'ambiente e de su territòriu?
Est beru, contra a su nucleare amus fatu fintzas unu adòbiu in sa ex Facultade de Lìteras de s'Universidade de Tàtari in ue amus invitadu totu sos movimentos. Sa chistione ambientale est una de cussas chi pertocat de prus sa sotziedade nostra, dae s'incuinamentu fintzas a lompere a sos fogos in s'istiu.
Su problema est semper sa cussèntzia e s'istrutzione metzana chi retzimus in iscola e in domo. Su traballu prus mannu de fàghere prus che àteru lu depent fàghere in sas iscolas primàrias comente sas elementares e sas mèdias cun unu pranu sèriu de educatzione ambientale.

Tenides in programma carchi àtera initziativa?
Pro su 13 de Trìulas amus organizadu una festa in su tzentru de Tàtari chi si mutit “A Tirrindò pa Sassari Vèciu”. A mangianu b'at a èssere una guida chi at a ammustrare su tzentru e sos logos istòricos de sa tzitade, a bortaedie cumbidamus a totus sa petza arrustu in sos tzìrculos chi ant collaboradu e a su matessi tempus b'at àere ispàssiu in sas carreras de su tzentru cun grupos de teatru de istrada. In Pratza de Santa Caterina a sero b'at a èssere unu cuntzertu de unu grupu sardu.
Collimus s'ocasione pro cumbidare totu cantos a bènnere a Tàtari pro fàghere festa cun nois.

Pro cuntatare s' Assòtziu Su Majolu: sumajolu@yahoo.com

Tàtari 02/07/2013
Assòtziu Zirichiltaggia